Di Kibulin Jin

Sketsa Betawi: Cici A. Ilyas

Udeh lama Helmi gerem ame kelakuan keponakannye, Sayuti. Gak tau kena pengaruh siape,  si Sayuti jadi demen banget maen dukun.  Mau cari kerja nanya ke dukun, pengen dapet jodoh lari ke dukun, ampe babehnye sakit dia ngandelin dukun kepercayaannye juga. Helmi udeh ingetin bekali-kali kalo perbuatannye itu dilarang dalam igame. Tapi alesan Sayuti die cuma ikhtiar.  Adapun doanye tetep mereka tujuin pada Alloh.

“Lagian ini kan bukan dukun kayak yang biasa, cing. Die cuman orang pinter. Orang yang punya kelebihan bisa berhubungan langsung dengan Alloh,” jelasnye. Helmi geleng-geleng kepale.

“Udah deh, nyang penting ni babeh lu kudu diapain kata itu si embah?” Tanya Helmi.

“Gak usah diapa-apain. Cukup minumin aer dari die.” Ngedenger  penjelasan itu Helmi langsung nyingkir. Die gak mau denger  Sayuti bakal ngoceh lagi, soal penyebab sakit abangnye nyang ame itu dukun dibilang kena guna-guna alias “dikerjain” orang.  Karena kalo diladenin, Sayuti pasti bakal ngajak lagi nelusurin orang-orang yang dianggap pesaing babehnye sebagai penjual kambing. Ujung-ujungnye jadi mengarah ke fitneh.

Sorenye, begitu diliat Sayuti gak ade baru helmi dateng lagi. Die bujuk empok iparnye supaya  bawa  abangnye ke dokter. Lantaran die yakin banget kalo abangnye tuh kena serangan strook ringan. Sebab abangnye emang udeh lama punya darah tinggi. Ngedenger rencana itu enyaknye Sayuti langsung nangis. Katanye die gak megang duit lagi. Semue duit dagangan sekarang ade di bawah penguasaan Sayuti. Helmi mingkinan gerem aje. Ini gak bisa dibiarin lagi, pikirnye. Walaupun die gak tau musti berbuat ape.

Dua hari akhirnye lewat begitu aje. Sang babeh nyang udeh gak bisa gerak gak bisa ngomong cuman terus diminumin aer dukun, nyang sebenernye gak nunjukin peobahan ape-ape. Tapi Sayuti tetep yakin ame keputusannye, sampe terjadi kehebohan dimalem ketige.   Madih, sepupu Sayuti yang dateng nglokin tiba-tiba kesurupan. Sembari kelojotan die tereak  minte disajiin macem-macem. Bekakak ayam, aer kelapa ijo,buah tujuh macem.

Helmi buru-buru nangkep itu keponakan. Tetangge nyang pada dateng ngedenger ade keributan juga pade bantuin nenangin. Tapi Madih gak berenti gegoakan dengan suara jin. Setelah  Sayuti janji mau  menuhin semue yang diminta, Madih baru rada tenang. Walaupun napasnye masih terus kayak orang ngorok dan matanye mendelik-delik.

“Nape jadi begini ?” Tanya Helmi pade Sayuti.

“Biase. Ni kayaknye jin yang diutus buat ngeluarin penyakitnye babeh kayaknye kewalahan,” jawab Sayuti dengan yakinnye.

“Kewalahan gimane?”

“Ya…saking kuatnye itu guna-guna….”  Akhirnye Helmi pura-pura ikut yakin aja, deh.

Gak sampe satu jam semua sesaji buat jin dalam tubuh Madih udeh siap diidangin. Madih langsung nyosor itu bekakak, kayak orang yang kelaparan. Abis itu die tenggak  aer kelapa. Tapi belon ampe abis dia lemparin semue nyang ade, sembari bekoar lagi.

“Gue gak sudi dikerjain lagi. Gue capek……!” teriaknye sembari nyembur-nyemburin ape aje nyang masih ade di mulut. Semua nyingkir,  kecuali Helmi nyang udeh megangin tangan Madih lagi.

“Lah, babeh…. Eh, engkong jin…., pan emang udeh tugasnye…” Sayuti nyautin.

“Gue bukan dokter, tolol….! Kalo elu dateng-dateng ke sono lagi, gue cekek lu…. Ggggzzzrr…!” Madih mingkinan kalap, berusahe nyerang Sayuti.

“Astaghfirullahal adzim…, sadar, Dih… istighfar…..!” tereak nyang lain sembari sama-sama nahanin gerakannye. Tapi boro-boro ‘nyebut’, Madih malah berontak lebih keras lagi, ampe orang-orang mulain pade kewalahan.  Enyaknye Sayuti nyang dari tadi cuman bisa nangis langsung berusahe nangkep anaknye.

“Udeh Yut…, lu janji deh ame ntuh jin…”

“Janji apaan, nyak?” Sayuti masih kurang terime sembari kebingungan.

“Janji, lu gak bakal dateng ke dukun lu lagi. Karena itu jin udeh gak mau diperentah….”

Sayuti tetep aje bengang-bengong kayak orang kememegan. Die masih pengen protes, tapi gak tau kudu bilang ape. Sementara orang-orang mulain kewalahain ngatasin gerakan Madih.   Semua jadi panik. 

“Udeh cepetan bilang, Ti. Ape lu mau celake?!” Helmi tereak keras.

“I…iye, babeh… engkong jin…, saye gak bakal ke sono-sono lagi….,” kate Sayuti. Suaranye gemeter. Ternyate diem-diem die ketakutan juga.

“Tarik perentah lu …..??!!!” gertak Madih.

“Iye, saye janji……, saye gak bakal minta tulung ape-ape lagi. Saya mau babeh ke dokter aje….”

Gusraaaak…., tiba-tiba badan Madih jatuh lemes. Helmi nyang berusaha nangkep ikutan jatuh. Die minta semue nyingkir rada jauh, supaye Madih bisa bernapas lega. Begitu nyang laen menjauh, sembari komat-kamit Helmi nempelin mulutnye ke kuping Madih.

“Udeh, sekarang pura-pura tidur aje lu!” bisiknye.

“Kena juga die dikibulin jin…” Madih nyaut pelan sembari ngatur napas.

“Iye, jinnye elu, jin  Madih!” bales Helmi. Keduanye diem-diem nahan tawa. ()
==========================================
Gambarnye bikinan M Abba Eban

Subscribe to receive free email updates:

2 Responses to "Di Kibulin Jin"