KAGAK KUAT AME OMELAN BINI BAWEL

Japra baru tau kalo bininye si Yuni, emang yuni tai. Kerjenye ngomel aje. Gak punya duit ngomel. Ade duit ngomel juga. Mau eni entu ngomel, kuping pedes tiap ari ngedengerin bininye ngomel. Bener-bener bukan aje cerewet, tapi ngeselin, empet rasanye. Kayak gak ade senengnye idup, kayak gak ade bahagienye. Dua taon bebini die rasanye puluan taon menderita. Gak abis pikir juga Japra, kenape waktu pacaran dan saat awal nike gak begitu kelakuan bininye.

Dua ari belakangan, Japra rungsing ati. Kantor tempatnye kerje ude mau tutup, artinye bakalan PHK dan siap jadi pengangguran. Urusan obyekan cuman gagal aje akhirnye. Di rume capek ngedengerin bini cerewet dan ngomel mulu.

Sambil ngelamun, Japra nimba ngisi kulem dikamar mandi, gak tau kenape die punya ide. Gak lama kumdian, Japra masuk, langsung die samber bininye dan dibawa kesumur. Langsung aje Japra lempar bininye kedalem sumur dan ditutup pake seng bekas tutup atas sumur.

Baru dua langkah Japra jalan ke dalem, die ngerasa dicolek. Kaget alang kepalang, dalem atinye kok bininye bisa naek lagi dari dalem sumur. Pas Japra nengok, die lebi kaget. Belon sempet nanya, nyang dibelakangnye bilang “ eeh..lu ambil lagi tuh bini lu. Gue gak sanggup!!" Biar kate rada gemeteran, lantaran nyang ngejeglek entu jin penunggu sumur, tapi Japra omong juga :  “emangnye kenape?”. Langsung ntu jin jawab :  “.. gak sanggup dah gue. Tuh pumpuan ngomel, ngedumel mulu. Berisik tau”
(ddg-mmk,tenabang, 06 Mei 2011)

Subscribe to receive free email updates:

1 Response to "KAGAK KUAT AME OMELAN BINI BAWEL"